الحرب الأهلية الإنجليزية: الحلقة الأولى – مُقدمة السلسلة

Play

 

الحدث التاريخي، بالغ الأهمية، اللي هنتكلم عليه النهاردة هو ما يعرف بالحرب الاهلية الإنجليزية، و اللي دارت ما بين الملك الإنجليزي شارلز الأول و اتباعه من الملكيين، و البرلمان الإنجليزي و اتباعه من المتمردين على الملك.. حرب طاحنة شملت مش بس إنجلترا، لكن أيضا ويلز و اسكتلندا و ايرلندا. قدرت خسايرها البشرية باكتر من 85 الف قتيل، ده غير الدمار المروع في الممتلكات. لكن التأثير التاريخي للحدث ده و الفترة دي مش مقتصر بس على مضمونها الحربي من معارك و أسلحة، و استراتيجيات و تكتيك، و طبعا خساير في الأرواح و الممتلكات؛ كمان كان ليها تأثير عظيم على مسار إنجلترا التاريخي. عشان كده الفترة دي لها مسميات تانية كتير غير كونها حرب أهلية.. يعني مثلا الاكاديميين المحافظين اللي كتبوا الموسوعة البريطانية عام 1911، بيطلقوا علي الفترة دي اسم، التمرد العظيم، اما اليساريين فبيطلقوا عليها اسم، الثورة الإنجليزية.

الحرب الأهلية الأنجليزية (1642-1651)
الحرب الأهلية الأنجليزية (1642-1651)

الحرب الاهلية الإنجليزية و رغم أهميتها التاريخية البالغة، الا انها مش واخدة حقها في الشهرة، و دي لأسباب عديدة، منها بعدها الزمني عننا في الوقت الحالي، و ده لأنها دارت ما بين 1642 و 1651، إضافة لإن فترة تأثيرها المباشر انتهت عام 1660. كمان و برغم التغييرات السياسية و الدينية المهولة اللي حصلت في الفترة دي، الا ان الشكل السياسي لأنجلترا رجع زي ما كان: يعني إنجلترا ملكية و صحيح انها اتحولت لجمهورية في النص، لكنها في الأخر عام 1660 رجعت ملكية تاني. كمان من أسباب عدم الاهتمام بالحدث اللي معانها النهاردة هو انه يبان، من بدايته لنهايته، على انه صراع محلي بين قوي انجليزية متناحرة، و ان مالوش تأثير على الساحة الأوربية و الدولية.




 

 طبعا الكلام ده مش صحيح.. الفترة دي كانت في غاية الاهمية، أولا لأنها اول حرب أهلية انجليزية تقوم – مش عشان تحدد مين اللي هيحكم – لأ، عشان تحدد طريقة الحكم ازاي، و اللي هتأدي بعد فترة مش كبيرة قوي، لصدور وثيقة الحقوق عام 1689، و الي أرست قواعد الحكم الديمقراطي لأول مرة في دولة عظمي في العصر الحديث، و اللي عن طريقها هيكون الحكم عن طريق أعضاء برلمانيين منتخبين (فيه دول اقدم في تطبيق الديموقراطية في العصور القديمة، بل و في العصور الحديثة كمان، لكنها ماكنتش فعالة و لا ذات تأثير زي النموذج الانجليزي). كمان خلال الفترة دي، و لأول مرة بيتم تداول مفهوم الأحزاب المتنافسة على السلطة.

الحرب الأهلية الأنجليزية فعلا اكبر من كونها حرب أهلية محلية..

 

الملك شارلز الأول - ملك انجلترا و اسكتلندا إبان الحرب الأهلية
الملك شارلز الأول – ملك انجلترا و اسكتلندا إبان الحرب الأهلية

معانا النهاردة قصة الملك شارلز الأول، ملك متوج على مملكتين غنيتين ورثهم عن والده اللي استمر في الحكم لمدة 22 من الحكم المستقر نسبيا وسط حالة من الرخاء و الازدهار الفكري و الثقافي. لكن شارلز الاول ضيع كل ده بتعنته و عدم مرونته و انحيازه الكامل لاصدقاءه المقربين، و تعاليه في تصرفاته مع المعارضين، و تهوره في اتخاذ القرارات. تآكلت شعبيته بمرور الوقت، فقد سيطرته على البلد، التمرد قام ضده في مكان، و الحرب الأهلية اشتعلت.. و في سنين معدودة بيفقد عرشه، بل و حياته نفسها.

 

:القائد العسكري و اللورد بروتكتور اوليفر كرومويل
القائد العسكري و اللورد بروتكتور: اوليفر كرومويل

معانا برضه قصة اتنين من القادة العسكريين، من نفس الفريق، الاتنين في خضم الحرب بيثبتوا موهوبتهم و تميزهم. اكبرهم منصبا، و اللي وصل في مرحلة من الحرب لأنه يبقي القائد العام لقوات فريقه، كان وازعه الأخلاقي مبني على مبادئ الحرية الفكرية و الدينية، لكنه ما قدرش ينسي او يدوس على انتماءه لطبقة النبلاء، و ولاءه للوطن بالمفهوم المتعارف عليه في الوقت ده، و هو الولاء للعرش. القائد العسكري التاني، و اللي كان نائب الأول، كان بالاضافة لتمييزه العسكري، موهوب سياسيا و اجتماعيا، لكن فكره كان مختلف راديكاليا – سياسيا و دينيا – عن العصر اللي اتولد فيه، و كان بيحلم بنظام جديد كان بيبشر بيها وسط الضباط و الجنود. في لحظة حاسمة في الحرب، بتحصل مواجهة بين القائد المحافظ و نائبه الراديكالي.. تفتكروا مين اللي انتصر؟ و اللي اهم، كان تأثير كل واحد فيهم ايه على مسار الاحداث؟

 

و معانا قصة بلد دمرتها الحرب الاهلية ؛ الاف الأرواح ازهقت و الاف الممتلكات اتدمرت،  لكن البلد خرجت من الحرب بعد عقود قليلة عشان تبقي الدولة الاقوي في العالم، سياسيا، علميا، اقتصاديا، و عسكريا.. ايه اللي عملته الحرب و الفترة عشان تحرر قوة الامة بالشكل الكبير ده؟

معانا برضه قصة صراع قدر يكون فيه للاعلام سطوة و يكون عامل حاسم رغم بدائيته بالنسبة لعصرنا. طبعا كان فيه اعتماد كبير على خطب الساسة في تجمعات الناس، زي في الكنايس و التجمعات التجارية و الاجتماعية. لكن في الفترة دي، و اللي بعد ازدهار فن الطباعة و رخصها نسبيا، كان هنا فيه سلاح جديد مؤثر و فعال، الا و هو سلاح المنشورات، و اللي  تم استخدامها بكثافة عالية جدا لنشر الأفكار و تعبئة الرأي العام.

 




Facebook Comments